Ons geld is al wat ooit goedkoper geword het

Dit lyk asof Suid-Afrikaanse vuisvoosverbruikers die gordels van sommer vroeg vanjaar af sal moet stywer intrek. Die paar handjievol Suid-Afrikaners (ons meen tog daar was heelwat van hulle) wat oor die afgelope feesgety verkies het om vir die eerste keer in ‘n lang tyd tuis te bly of dalk aansienlik minder oordadig te wees en met ‘n veel meer beskeie vakansie tevrede was, was in alle waarskynlikheid die wyse manne onder ons. 
Dan kan verbruikers hulself ook maar begin staal vir die “gebruiklike” verhoging in elektrisiteitstariewe terwyl ‘n styging in rentekoerse ook nog in dieselfde kwartaal verwag word. ‘n Mens kan nie help om te dink aan die ouers van leerders wat vanjaar vir die eerste skool toe, of vir die eerste keer hoërskool toe gaan nie. Die prys van skoolklere en ander benodigdhede steek lankal glad nie meer af by dié van gewone klere nie, maar dit is nie hier waar dit ophou nie. Dan wil Boeta of Sus vanjaar sekerlik ook hul merk op die sportveld maak en almal weet wat sporttoerusting deesdae kos. ‘n Mens weet deesdae nie aldag meer watter kant toe nie - alles kos by die dag net veel duurder terwyl dit wat jy vir jou geld kry, by die dag net kleiner of minder word. Party van ons sal seker nog goed kan onthou - die oumense het in ‘n stadium dikwels al suggend opgemerk: “Al wat nog ooit in hierdie land goedkoper geword het, is ons geld!” ‘n Mens kan in hierdie tyd amper nie aan ‘n groter waarheid dink nie...

Sommer hier in die tweede maand van die nuwe jaar is daar reeds talle aanduidings dat brandstofpryse, elektrisiteitstariewe en na verwagting ook rentekoerse gaan styg wat beteken dat die eerste kwartaal van 2022 nie ‘n verbruikersvriendelike periode gaan wees nie. Aan die ander kant, dalk het diegene wat die afgelope feesgety die bekers laat oorloop het en die tafels laat kreun het ‘n beter blik op die toekoms gehad omdat hulle dalk besef het dat hierdie waarskynlik die laaste oorvloedigheid in ‘n bitter lang tyd sou wees. Met die brandstofprys wat die afgelope paar jaar reeds omtrent elke maand of twee ‘n styging toon behoort dit nie ‘n verrassing te wees dat die volgende brandstofprysstyging sommer met die intrapslag van die eerste Woensdag in Februarie 2022 verwag word nie.